शहर कब्बो रास न आईल

धुरि में लथेडाईल देहि 
चिकई अउर कबड्डी कै जोश 
गुल्ली डंडा कै टांड
आईस- पाईस कै 
छुपम छुपी वाला खेल
कहवा चलि गईल उ दिन
शायद दुरे जाके भी 
हमरे मन में आपन याद छोड़ी गईल 
रही रही के कसक जगावे खातिन ।

अमवा के बौर लागल डारी
बरबस खींच लेले मनवा के 
अपने टिकोरवा की ओरि
अउर मनवा दौड़ पड़ेला 
अमवा के बगिया की ओरे
जईसन बचपन में दीवाना रहल ।

अमरुदवा के डारी डारी 
खेलत लखनी अउर कलैया
खेतवा के मेडी मेडी दौड़त
संझवा के दौड़
कुछो नाहि भुलाईल 
सालन बाद भी शहर में रहि के 
शहर कब्बो रास न आईल ।   
 
 
 
  

माई

ऊ खुद आपन सीनवा  में 

छुपावत  रहि गईल 

जिनगी भर 

गमे के पहाड़ 

बकिन तै हमके कईले बडियार

हँसाई हँसाई के

तनिको न होखे देहले

ई बात के एहसास

ऊ रोई रोई के भी

अगर हंसल तै 

खाली हमके हंसावय  खातिन

जब जब हम गिरत रहनी 

छोड़ी देति रहल ऊ माई

बिलकुल हमके  अकेल

हर दाई हम  कोशिश कईनीं

उठी के खड़ा भईले के

अउर  जब  जब हम

उठी के  खड़ा भईनीं

ऊ हमार पियार से 

माथा चुमि लेत रहल 

अउर आज अगर हम खड़ा बानी तै

खाली ऊ माई के बदौलत

सच्चो में ई पियार आज सालन बाद भी

नईखे भूलाला ।।